udayaprabha
ಬೆಳಗಾವಿ : ಹುಬ್ಬಳ್ಳಿ-ಬೆಳಗಾವಿ-ಪುಣೆ ನಡುವೆ ವಂದೇ ಭಾರತ್ ರೈಲು ಸಂಚಾರಕ್ಕೆ ಸೆ.16ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ಚಾಲನೆ ನೀಡಲಿದ್ದಾರೆ. ರವಿವಾರದ ಬದಲು ಸೋಮವಾರ ಈ ಕಾರ್ಯಕ್ರಮ ಇದೀಗ ತುಸು ಬದಲಾವಣೆಗೊಂಡಿದೆ. ಪ್ರಧಾನಿ ಮೋದಿ ಅವರು ಅಂದು ಅಹ್ಮದಾಬಾದ್ ನಿಂದ ವರ್ಚುವಲ್ ಮೂಲಕ ವಂದೇ ಭಾರತ್ ರೈಲು ಸಂಚಾರಕ್ಕೆ ಚಾಲನೆ ನೀಡಲಿದ್ದಾರೆ.
ಸೆ.16ರಂದು ಹುಬ್ಬಳ್ಳಿ-ಬೆಳಗಾವಿ-ಪುಣೆ ನಡುವೆ ವಂದೇ ಭಾರತ್ ಎಕ್ಸಪ್ರೆಸ್ ರೈಲು ಸಂಚಾರ ಆರಂಭಿಸಲಿದ್ದು, ಹುಬ್ಬಳ್ಳಿಯಿಂದ ಸೆ.18ರಿಂದ ಸಂಚಾರ ಆರಂಭವಾಗಲಿದೆ.
ವಾರದಲ್ಲಿ ಮೂರು ಬಾರಿ ಬುಧವಾರ, ಶುಕ್ರವಾರ, ರವಿವಾರ ಹುಬ್ಬಳ್ಳಿಯಿಂದ ಹಾಗೂ ಗುರುವಾರ, ಶನಿವಾರ, ಸೋಮವಾರದಂದು ಪುಣೆಯಿಂದ ವಂದೇ ಭಾರತ್ ಎಕ್ಸ್ ಪ್ರೆಸ್ ಸಂಚರಿಸಲಿದೆ.ಈ ರೈಲು, ಹುಬ್ಬಳ್ಳಿ-ಪುಣೆ ನಡುವೆ ನೇರವಾಗಿ ಸಂಚರಿಸಲಿದ್ದು ಕೊಲ್ಲಾಪುರ ಮೂಲಕ ಸಂಚರಿಸುವುದಿಲ್ಲ. ಪ್ರಯಾಣಿಕರ ಸ್ಪಂದನೆ ಮತ್ತು ಜನದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು ಮುಂದಿನ ದಿನಗಳಲ್ಲಿ ಈ ರೈಲುನ್ನು ಪ್ರತಿ ದಿನ ಸಂಚರಿಸುವ ನಿಟ್ಟಿನಲ್ಲಿ ಪ್ರಯತ್ನ ನಡೆಸಲಾಗುವುದು ಎಂದು ಜನಪ್ರತಿನಿಧಿಗಳು ಈಗಾಗಲೇ ತಿಳಿಸಿದ್ದಾರೆ.
ಹುಬ್ಬಳ್ಳಿ-ಪುಣೆ ವಂದೇ ಭಾರತ್ ರೈಲು ಸಂಚಾರದಿಂದ ಉತ್ತರ ಕರ್ನಾಟಕ ಭಾಗದ ವಾಣಿಜ್ಯೋದ್ಯಮಕ್ಕೆ, ಕೈಗಾರಿಕಾ ವಸಾಹತುಗಳಿಗೆ ಅನಕೂಲವಾಗಲಿದೆ. ಮುಂಬೈ ಸಂಪರ್ಕಕ್ಕೆ ಈ ಮಾರ್ಗ ಪ್ರಮುಖವಾಗಲಿದೆ. ಬಿಡುಗಡೆಯಾದ ಸರ್ಕ್ಯೂಲರ್ (ಸಿಸಿ 315-2024) ಆದೇಶದ ಪ್ರಕಾರ ರೈಲ್ವೇ ಬೋರ್ಡ್ ಈ ಮಾಹಿತಿಯನ್ನು ನೀಡಿದೆ. ಹುಬ್ಬಳ್ಳಿ ಮತ್ತು ಪುಣೆಯ ನಡುವಿನ ಸುಮಾರು 8.30 ತಾಸಿನ ಪ್ರಯಾಣ ಇದಾಗಿದೆ. ಹುಬ್ಬಳ್ಳಿಯಿಂದ ಬೆಳಗ್ಗಿನ ಜಾವ 5 ಗಂಟೆಗೆ ಹೊರಡುವ ವಂದೇ ಭಾರತ್ ರೈಲು, ಮಧ್ಯಾಹ್ನ 1.30ರ ಸುಮಾರಿಗೆ ಪುಣೆಗೆ ತಲುಪಲಿದೆ. ಅದೇ ರೀತಿ, ಮಧ್ಯಾಹ್ನ 2.15ಕ್ಕೆ ಹೊರಡುವಈ ರೈಲು, ರಾತ್ರಿ 10.45ಕ್ಕೆ ಹುಬ್ಬಳ್ಳಿ ತಲುಪಲಿದೆ. ಈ ವಂದೇ ಭಾರತ್ ರೈಲು ಧಾರವಾಡ, ಬೆಳಗಾವಿ, ಮೀರಜ್, ಸಾಂಗ್ಲಿ ಮತ್ತು ಸತಾರದಲ್ಲಿ ನಿಲುಗಡೆ ಇರಲಿದೆ.
ಧಾರವಾಡ, ಸಾಂಗ್ಲಿ ಮತ್ತು ಸತಾರದಲ್ಲಿ ಎರಡು ನಿಮಿಷ, ಮತ್ತು, ಬೆಳಗಾವಿ ಮತ್ತು ಮೀರಜ್ ನಲ್ಲಿ ಐದು ನಿಮಿಷ ರೈಲು ನಿಲ್ಲಲಿದೆ. ಬೆಂಗಳೂರು – ಧಾರವಾಡ, ಮೈಸೂರು – ಚೆನ್ನೈ, ಯಶವಂತಪುರ – ಕಾಚಿಗುಡ, ಬೆಂಗಳೂರು ಕಂಟೋನ್ಮೆಂಟ್ – ಕೊಯಂಬತ್ತೂರು, ಮಂಗಳೂರು ಸೆಂಟ್ರಲ್ – ಮಡಗಾಂವ್, ಬೆಂಗಳೂರು – ಕಲಬುರ್ಗಿ, ಈ ಮಾರ್ಗದಲ್ಲಿ ಸದ್ಯ, ವಂದೇ ಭಾರತ್ (ಕರ್ನಾಟಕದಿಂದ) ಸಂಚರಿಸುತ್ತಿವೆ.
