udayaprabha
ಬೆಂಗಳೂರು : ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಕ್ರೆಡಿಟ್ ಕಾರ್ಡ್ ಶುಲ್ಕಗಳಲ್ಲಿ ಬದಲಾವಣೆಗಳನ್ನು ಮಾಡಲಾಗುತ್ತಿದೆ. ನೀರಿನ ಬಿಲ್, ವಿದ್ಯುತ್ ಬಿಲ್, ಮೊಬೈಲ್ ಬಿಲ್ ಇತ್ಯಾದಿ ಯುಟಿಲಿಟಿ ಪೇಮೆಂಟ್ಗಳ ಶುಲ್ಕದಲ್ಲಿ ಬದಲಾವಣೆ ಇದೆ. ಬಡ್ಡಿದರ, ರಿವಾರ್ಡ್ಸ್ ಮಿತಿ, ಟ್ರಾನ್ಸಾಕ್ಷನ್ ಫೀ ಇತ್ಯಾದಿಯಲ್ಲೂ ಬದಲಾವಣೆ ಆಗುತ್ತಿದೆ. ನವೆಂಬರ್ 1ರಿಂದಲೇ ಈ ಹೊಸ ಶುಲ್ಕಗಳು ಅನ್ವಯಕ್ಕೆ ಬರಲಿವೆ. ಎಸ್ಬಿಐ ಕ್ರೆಡಿಟ್ ಕಾರ್ಡ್ ಮೂಲಕ ದೊಡ್ಡ ಮೊತ್ತದ ಯುಟಿಲಿಟಿ ಬಿಲ್ ಪೇಮೆಂಟ್ ಇದ್ದರೆ ಅದರ ಮೇಲೆ ಶೇ. 1ರಷ್ಟು ಸರ್ಚಾರ್ಜ್ (ಹೆಚ್ಚುವರಿ ಶುಲ್ಕ) ಅನ್ನು ವಿಧಿಸಲಾಗುತ್ತದೆ. ಒಂದು ಬಿಲ್ಲಿಂಗ್ ಸೈಕಲ್ನಲ್ಲಿ ನಿಮ್ಮ ಯುಟಿಲಿಟಿ ಪೇಮೆಂಟ್ಸ್ ಮೊತ್ತ 50,000 ರೂ ಮೀರಿದರೆ ಆಗ ಶೇ. 1ರ ಸರ್ಚಾರ್ಜ್ ಹೇರಿಕೆ ಆಗುತ್ತದೆ. ವಿದ್ಯುತ್, ಗ್ಯಾಸ್ ಮತ್ತು ನೀರಿನ ಬಿಲ್ ಇತ್ಯಾದಿ ಯುಟಿಲಿಟಿ ಪೇಮೆಂಟ್ಗಳಿಗೆ ಈ ಹೆಚ್ಚುವರಿ ಶುಲ್ಕ ಅನ್ವಯ ಆಗುತ್ತದೆ. ಅನ್ಸೆಕ್ಯೂರ್ಡ್ ಕ್ರೆಡಿಟ್ ಕಾರ್ಡ್ಗಳಿಗೆ ಎಸ್ಬಿಐ ಫೈನಾನ್ಸ್ ಶುಲ್ಕಗಳನ್ನು ಹೆಚ್ಚಿಸುತ್ತಿದೆ. ಶೌರ್ಯ ಕಾರ್ಡ್ ಮತ್ತು ಡಿಫೆನ್ಸ್ ಕಾರ್ಡ್ ಹೊರತುಪಡಿಸಿ ಉಳಿದೆಲ್ಲಾ ಅನ್ಸೆಕ್ಯೂರ್ಡ್ ಕ್ರೆಡಿಟ್ ಕಾರ್ಡ್ಗಳಲ್ಲಿ ಫೈನಾನ್ಸ್ ಚಾರ್ಜ್ ತಿಂಗಳಿಗೆ ಶೇ. 3.75ರಷ್ಟಿರುತ್ತದೆ. ಫೈನಾನ್ಸ್ ಚಾರ್ಜ್ ಎಂದರೆ ಬಡ್ಡಿದರ. ಬಿಲ್ ಕಟ್ಟದೇ ಬಾಕಿ ಉಳಿಸಿಕೊಳ್ಳುವ ಹಣಕ್ಕೆ ಮಾಸಿಕವಾಗಿ ಬಡ್ಡಿ ಹಾಕಲಾಗುತ್ತದೆ. ಇಲ್ಲಿ ಅನ್ಸೆಕ್ಯೂರ್ಡ್ ಕ್ರೆಡಿಟ್ ಕಾರ್ಡ್ ಎಂದರೆ ಯಾವುದೇ ಹಣಕಾಸು ಭದ್ರತೆ ಇಲ್ಲದೇ ನೀಡಲಾಗುವ ಕಾರ್ಡ್. ಸಾಮಾನ್ಯವಾಗಿ ಬಳಕೆಯಲ್ಲಿ ಇರುವ ಬಹುತೇಕ ಕ್ರೆಡಿಟ್ ಕಾರ್ಡ್ಗಳೂ ಅನ್ಸೆಕ್ಯೂರ್ಡ್ ಕಾರ್ಡ್ಗಳೇ.
