ನವದೆಹಲಿ: ಜಾಗತಿಕ ತಂತ್ರಜ್ಞಾನ ವಲಯದಲ್ಲಿ ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಕ್ಲೌಡ್ ಮೂಲಸೌಕರ್ಯಕ್ಕೆ ಭಾರಿ ಪ್ರಮಾಣದಲ್ಲಿ ಹೂಡಿಕೆ ನಡೆಯುತ್ತಿರುವ ಬೆನ್ನಲ್ಲೇ, ಒರಾಕಲ್ (Oracle) ಕಂಪನಿಯಲ್ಲಿ ಮತ್ತೊಂದು ಸುತ್ತಿನ ಉದ್ಯೋಗ ಕಡಿತ ನಡೆದಿದೆ. ಕೆಲ ಒರಾಕಲ್ ಉದ್ಯೋಗಿಗಳಿಗೆ ಬೆಳಗ್ಗೆ ಸುಮಾರು 6 ಗಂಟೆಗೆ ಬಂದ ಇ-ಮೇಲ್ ಅವರ ಕೆಲಸದ ಕೊನೆಯ ದಿನವನ್ನು ನಿರೀಕ್ಷೆಗೂ ಮುನ್ನ ತಿಳಿಸಿದೆ. “ನಿಮ್ಮ ಹುದ್ದೆಗೆ ಸಂಬಂಧಿಸಿದಂತೆ ಕೆಲವು ಕಠಿಣ ಸುದ್ದಿಯನ್ನು ಹಂಚಿಕೊಳ್ಳುತ್ತಿದ್ದೇವೆ… ಇಂದು ನಿಮ್ಮ ಕೊನೆಯ ಕೆಲಸದ ದಿನ” ಎಂದು ಇ-ಮೇಲ್ನಲ್ಲಿ ತಿಳಿಸಲಾಗಿತ್ತು.
ಬಿಸಿನೆಸ್ ಇನ್ಸೈಡರ್ ವರದಿ ಪ್ರಕಾರ, ಎಐ ಮತ್ತು ಕ್ಲೌಡ್ ಮೂಲಸೌಕರ್ಯ ನಿರ್ಮಾಣಕ್ಕೆ ಒರಾಕಲ್ ಭಾರಿ ಪ್ರಮಾಣದಲ್ಲಿ ಹಣ ವ್ಯಯಿಸುತ್ತಿರುವ ಸಂದರ್ಭದಲ್ಲಿ ಈ ಉದ್ಯೋಗ ಕಡಿತ ನಡೆದಿದೆ. ಆದರೆ, ಈ ಬಾರಿ ಎಷ್ಟು ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ ಎಂಬುದನ್ನು ಕಂಪನಿ ಅಧಿಕೃತವಾಗಿ ಬಹಿರಂಗಪಡಿಸಿಲ್ಲ.
ಉದ್ಯೋಗ ಕಡಿತದ ಕುರಿತು ಕಳುಹಿಸಲಾದ ವಜಾ ಇ-ಮೇಲ್ನಲ್ಲಿ, “ ಸಂಸ್ಥೆಯ ವ್ಯಾಪಕ ಪುನರ್ರಚನೆಯ” (broader organisational change) ಭಾಗವಾಗಿ ಉದ್ಯೋಗಿಗಳ ಹುದ್ದೆಗಳನ್ನು ರದ್ದುಪಡಿಸಲಾಗುತ್ತಿದೆ ಎಂದು ತಿಳಿಸಲಾಗಿದೆ. ಆದರೆ, ನಿರ್ದಿಷ್ಟ ಉದ್ಯೋಗಿಗಳನ್ನೇ ಏಕೆ ಕೆಲಸದಿಂದ ತೆಗೆದುಹಾಕಲಾಗುತ್ತಿದೆ ಎಂಬುದಕ್ಕೆ ಯಾವುದೇ ಕಾರಣವನ್ನು ನೀಡಲಾಗಿಲ್ಲ.
ಇದರ ಜೊತೆಗೆ, ಒರಾಕಲ್ನ ಕಂಪ್ಯೂಟರ್ ವ್ಯವಸ್ಥೆಗಳು, ಇ-ಮೇಲ್, ವಾಯ್ಸ್ಮೇಲ್ ಹಾಗೂ ಕಡತಗಳಿಗೆ ಉದ್ಯೋಗಿಗಳ ಪ್ರವೇಶವನ್ನು ಶೀಘ್ರದಲ್ಲೇ ಸ್ಥಗಿತಗೊಳಿಸಲಾಗುವುದು ಎಂದು ತಿಳಿಸಲಾಗಿದೆ. ಕೆಲಸದಿಂದ ತೆಗೆಯುವುದಕ್ಕೆ ಸಂಬಂಧಿಸಿದ ಪರಿಹಾರದ ಹಣ (severance) ಹಾಗೂ ಇತರ ದಾಖಲೆಗಳನ್ನು ಪಡೆಯಲು ವೈಯಕ್ತಿಕ ಇ-ಮೇಲ್ ವಿಳಾಸವನ್ನು ನೀಡುವಂತೆ ಉದ್ಯೋಗಿಗಳಿಗೆ ಸೂಚಿಸಲಾಗಿದೆ.
ಉದ್ಯೋಗಿಗಳಿಗೆ ಇ-ಮೇಲ್ ಬಂದ ಸಮಯದಿಂದ ಕಂಪನಿ ವ್ಯವಸ್ಥೆಗಳಿಗೆ ಪ್ರವೇಶ ಕಳೆದುಕೊಳ್ಳುವವರೆಗೆ ಬಹಳ ಕಡಿಮೆ ಸಮಯವಿದ್ದುದರಿಂದ, ಈ ಬಾರಿ ನಡೆದಿರುವ ಉದ್ಯೋಗ ಕಡಿತ ಮತ್ತಷ್ಟು ಗಮನ ಸೆಳೆದಿದೆ.
ಎಐಗಾಗಿ ಶತಕೋಟಿ ಡಾಲರ್ ಹೂಡಿಕೆ, ಮತ್ತೊಂದೆಡೆ ಉದ್ಯೋಗ ಕಡಿತ
ಎಐ ಕ್ಷೇತ್ರದ ವೇಗದ ಬೆಳವಣಿಗೆಯನ್ನು ಬಳಸಿಕೊಳ್ಳಲು ಅಗತ್ಯವಿರುವ ದತ್ತಾಂಶ ಕೇಂದ್ರಗಳು (data centres) ಮತ್ತು ಕಂಪ್ಯೂಟಿಂಗ್ ಮೂಲಸೌಕರ್ಯ ನಿರ್ಮಾಣಕ್ಕೆ ಒರಾಕಲ್ ಭಾರಿ ಪ್ರಮಾಣದಲ್ಲಿ ಹಣ ಹೂಡುತ್ತಿದೆ. 2027ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕಂಪನಿ 28.5 ಶತಕೋಟಿ ಡಾಲರ್ ಹಣ ಹೂಡಿಕೆ ಮಾಡಿದೆ. ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಮಾಡಿದ್ದ 8.5 ಶತಕೋಟಿ ಡಾಲರ್ ಹೂಡಿಕೆಗೆ ಹೋಲಿಸಿದರೆ ಇದು ಮೂರು ಪಟ್ಟು ಹೆಚ್ಚಾಗಿದೆ.
ಇದೇ ಮೊದಲ ಬಾರಿಗೆ ಬಹಿರಂಗಗೊಂಡ ರಹಸ್ಯ
2027ರ ಇಡೀ ಹಣಕಾಸು ವರ್ಷಕ್ಕೆ 90ರಿಂದ 95 ಶತಕೋಟಿ ಡಾಲರ್ ಬಂಡವಾಳ ವೆಚ್ಚ ಮಾಡುವ ತನ್ನ ಮುನ್ಸೂಚನೆಯನ್ನು ಒರಾಕಲ್ ಮುಂದುವರಿಸಿದೆ. ಇದೇ ವೇಳೆ, ಅದರ ಎಐ ಕ್ಲೌಡ್ ಸೇವೆಗಳಿಗೆ ಬೇಡಿಕೆ ಬಲವಾಗಿದೆ. ತ್ರೈಮಾಸಿಕ ಅವಧಿಯಲ್ಲಿ 30 ಶತಕೋಟಿ ಡಾಲರ್ಗಿಂತ ಹೆಚ್ಚಿನ ಮೊತ್ತದ ಹೆಚ್ಚುವರಿ ಎಐ ಕ್ಲೌಡ್ ಒಪ್ಪಂದಗಳಿಗೆ ಸಹಿ ಹಾಕಿರುವುದಾಗಿ ಕಂಪನಿ ತಿಳಿಸಿದೆ.
ಆದರೆ, ಇಂತಹ ಮೂಲಸೌಕರ್ಯ ನಿರ್ಮಾಣಕ್ಕೆ ಭಾರಿ ವೆಚ್ಚವಾಗುತ್ತಿದೆ. ತ್ರೈಮಾಸಿಕದಲ್ಲಿ ಒರಾಕಲ್ನ ಮುಕ್ತ ನಗದು ಹರಿವು (free cash flow) 5.4 ಶತಕೋಟಿ ಡಾಲರ್ ನಕಾರಾತ್ಮಕವಾಗಿತ್ತು. ಹೀಗಾಗಿ ಎಐ ಅವಕಾಶವನ್ನು ಬಳಸಿಕೊಳ್ಳಲು ಆಕ್ರಮಣಕಾರಿಯಾಗಿ ಹಣ ಹೂಡಿಕೆ ಮಾಡುವುದರ ಜತೆಗೆ ವೆಚ್ಚಗಳ ಮೇಲೂ ಕಟ್ಟುನಿಟ್ಟಿನ ನಿಯಂತ್ರಣ ಸಾಧಿಸುವ ಸವಾಲನ್ನು ಕಂಪನಿ ಎದುರಿಸುತ್ತಿದೆ.
ಈಗಾಗಲೇ 21 ಸಾವಿರ ಉದ್ಯೋಗ ಕಡಿತ
ಒರಾಕಲ್ನ ಉದ್ಯೋಗಿಗಳ ಸಂಖ್ಯೆ 2026ರ ಹಣಕಾಸು ವರ್ಷದಲ್ಲಿ ಸುಮಾರು 21 ಸಾವಿರದಷ್ಟು, ಅಂದರೆ ಶೇ.13ರಷ್ಟು ಕಡಿಮೆಯಾಗಿದೆ. ಮೇ ಅಂತ್ಯದ ವೇಳೆಗೆ ಕಂಪನಿಯ ಜಾಗತಿಕ ಉದ್ಯೋಗಿಗಳ ಸಂಖ್ಯೆ ಸುಮಾರು 1.41 ಲಕ್ಷಕ್ಕೆ ಇಳಿದಿತ್ತು. ಒಂದು ವರ್ಷದ ಹಿಂದೆ ಉದ್ಯೋಗಿಗಳ ಸಂಖ್ಯೆ ಸುಮಾರು 1.62 ಲಕ್ಷದಷ್ಟಿತ್ತು.
ಕಂಪನಿಯ ಪುನರ್ರಚನೆಗೆ ಸಂಬಂಧಿಸಿದ ಪರಿಹಾರ ಹಣ ಹಾಗೂ ಇತರ ವೆಚ್ಚಗಳಿಗಾಗಿ ಕಂಪನಿ ಆ ಹಣಕಾಸು ವರ್ಷದಲ್ಲಿ ಸುಮಾರು 1.84 ಶತಕೋಟಿ ಡಾಲರ್ ಖರ್ಚು ಮಾಡಿದೆ. ಉದ್ಯೋಗಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ನಿರ್ಧಾರದ ಹಿಂದೆ ಎಐ ಅಳವಡಿಕೆ ಮತ್ತು ನಿಯೋಜನೆಯೂ (deployment) ಪ್ರಮುಖ ಅಂಶಗಳಾಗಿವೆ ಎಂದು ಒರಾಕಲ್ ಹೇಳಿದೆ.
ಇತ್ತೀಚೆಗೆ ಪುನರ್ರಚನೆಗೆ ಸಂಬಂಧಿಸಿದ ನಿರೀಕ್ಷಿತ ವೆಚ್ಚವನ್ನು ಕಂಪನಿ ಹೆಚ್ಚುವರಿಯಾಗಿ 700 ಮಿಲಿಯನ್ ಡಾಲರ್ ಹೆಚ್ಚಿಸಿದೆ. ಇದರೊಂದಿಗೆ 2026ರ ಹಣಕಾಸು ವರ್ಷದ ಪುನರ್ರಚನಾ ಕಾರ್ಯಕ್ರಮದ ಅಂದಾಜು ವೆಚ್ಚ ಸುಮಾರು 2.8 ಶತಕೋಟಿ ಡಾಲರ್ಗೆ ಏರಿಕೆಯಾಗಿದೆ.
ಹೀಗಾಗಿ, ಒರಾಕಲ್ನಲ್ಲಿ ಇದೀಗ ನಡೆದಿರುವ ಹೊಸ ಉದ್ಯೋಗ ಕಡಿತವು ಕೇವಲ ಒಂದು ಬಾರಿಯ ವೆಚ್ಚ ಕಡಿತದ ಕ್ರಮವಲ್ಲ. ಇದು ಕಂಪನಿಯಲ್ಲಿ ನಡೆಯುತ್ತಿರುವ ದೊಡ್ಡ ಪ್ರಮಾಣದ ಪುನರ್ರಚನೆಯ ಭಾಗವಾಗಿದೆ ಎಂಬುದು ಸ್ಪಷ್ಟವಾಗಿದೆ.
ಒರಾಕಲ್ ಮಾತ್ರವಲ್ಲ, ಇಡೀ ಟೆಕ್ ವಲಯದಲ್ಲೇ ಉದ್ಯೋಗ ಕಡಿತ
ಒರಾಕಲ್ನಲ್ಲಿ ನಡೆಯುತ್ತಿರುವ ಬೆಳವಣಿಗೆ ತಂತ್ರಜ್ಞಾನ ಉದ್ಯಮದಲ್ಲಿನ ದೊಡ್ಡ ಬದಲಾವಣೆಯ ಒಂದು ಭಾಗವಾಗಿದೆ. ಸೆಪ್ಟೆಂಬರ್ ಮೊದಲ 10 ದಿನಗಳಲ್ಲೇ ತಂತ್ರಜ್ಞಾನ ಕ್ಷೇತ್ರದಲ್ಲಿ 6 ಸಾವಿರಕ್ಕೂ ಹೆಚ್ಚು ಉದ್ಯೋಗಗಳನ್ನು ಕಡಿತಗೊಳಿಸಲಾಗಿದೆ. ಉಬರ್, ಪೇಪಾಲ್, ಆ್ಯಪಲ್, ಜೊಮ್ಯಾಟೊ ಮತ್ತು ಒರಾಕಲ್ ಸೇರಿದಂತೆ ಹಲವು ಕಂಪನಿಗಳು ಉದ್ಯೋಗಿಗಳ ಸಂಖ್ಯೆಯನ್ನು ಕಡಿಮೆ ಮಾಡಿದ ಸಂಸ್ಥೆಗಳ ಪಟ್ಟಿಯಲ್ಲಿವೆ.
Layoffs.fyi ದತ್ತಾಂಶದ ಪ್ರಕಾರ, ಸೆಪ್ಟೆಂಬರ್ 10ರವರೆಗೆ ಜಾಗತಿಕವಾಗಿ 299 ಕಂಪನಿಗಳ 1,28,536 ತಂತ್ರಜ್ಞಾನ ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ. ಗಮನಾರ್ಹ ಸಂಗತಿಯೆಂದರೆ, 2025ರ ಇಡೀ ವರ್ಷದಲ್ಲಿ 278 ಕಂಪನಿಗಳಲ್ಲಿ ದಾಖಲಾಗಿದ್ದ 1,22,606 ಉದ್ಯೋಗ ಕಡಿತಕ್ಕಿಂತ ಈ ಸಂಖ್ಯೆ ಈಗಾಗಲೇ ಹೆಚ್ಚಾಗಿದೆ.
ಎಐ ಅಳವಡಿಕೆ ವ್ಯಾಪಕವಾದರೆ ಅಮೆರಿಕದಲ್ಲಿ ಶೇ.6ರಿಂದ 7ರಷ್ಟು ಉದ್ಯೋಗಗಳು ಅಪಾಯಕ್ಕೆ ಸಿಲುಕಬಹುದು ಎಂದು ಗೋಲ್ಡ್ಮನ್ ಸ್ಯಾಕ್ಸ್ ಅಂದಾಜಿಸಿದೆ. ಸಾಫ್ಟ್ವೇರ್ ಅಭಿವೃದ್ಧಿ, ಗ್ರಾಹಕ ಸೇವೆ ಹಾಗೂ ಆಡಳಿತಾತ್ಮಕ ಕೆಲಸಗಳು ಎಐನಿಂದ ಹೆಚ್ಚು ಪರಿಣಾಮಕ್ಕೆ ಒಳಗಾಗಬಹುದಾದ ಉದ್ಯೋಗಗಳಾಗಿವೆ.
ಸ್ಟ್ಯಾನ್ಫೋರ್ಡ್ ಡಿಜಿಟಲ್ ಎಕಾನಮಿ ಲ್ಯಾಬ್, ಎಡಿಪಿ (ADP) ವೇತನದತ್ತಾಂಶ ಆಧರಿಸಿ ನಡೆಸಿದ ಅಧ್ಯಯನದಲ್ಲೂ ಎಐಗೆ ಹೆಚ್ಚು ಒಡ್ಡಿಕೊಳ್ಳುವ ಉದ್ಯೋಗಗಳಲ್ಲಿ ಕೆಲಸ ಮಾಡುತ್ತಿರುವ ಯುವ ಉದ್ಯೋಗಿಗಳು ಇತರರಿಗಿಂತ ಹಿಂದೆ ಬೀಳುತ್ತಿರುವುದು ಕಂಡುಬಂದಿದೆ. ಎಐನಿಂದ ಹೆಚ್ಚು ಪ್ರಭಾವಿತವಾಗುವ ಉದ್ಯೋಗಗಳಲ್ಲಿ 22ರಿಂದ 25 ವರ್ಷದೊಳಗಿನವರ ಉದ್ಯೋಗ ಪ್ರಮಾಣವು, ಕಡಿಮೆ ಎಐ ಪ್ರಭಾವವಿರುವ ಉದ್ಯೋಗಗಳಲ್ಲಿನ ಸಮಾನ ವಯೋಮಾನದವರಿಗಿಂತ 19ರಷ್ಟು ಕಡಿಮೆಯಾಗಿದೆ ಎಂದು ಅಧ್ಯಯನ ತಿಳಿಸಿದೆ.
,
