ಕೊಲ್ಲಾಪುರ: 19 ವರ್ಷದ ಯುವಕನೊಬ್ಬ ತನ್ನ ಚಿಕ್ಕಪ್ಪನ ಮನೆಯಲ್ಲಿದ್ದ ಸುಮಾರು 15 ತೊಲೆ (ಅಂದಾಜು 150 ಗ್ರಾಂ) ಚಿನ್ನಾಭರಣಗಳನ್ನು ಕದ್ದು, ಅವುಗಳನ್ನು ₹10 ಲಕ್ಷಕ್ಕೆ ಮಾರಾಟ ಮಾಡಿ ಮಹೀಂದ್ರಾ ಥಾರ್ ಎಸ್‌ಯುವಿ ಖರೀದಿಸಿರುವ ಘಟನೆ ಮಹಾರಾಷ್ಟ್ರದ ಕೊಲ್ಲಾಪುರ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಅಚ್ಚರಿಯ ಸಂಗತಿಯೆಂದರೆ, ತಾನು ಖರೀದಿಸಿದ ಹೊಸ ವಾಹನವನ್ನು ಮನೆಗೆ ತಂದ ಬಳಿಕ ಅದರ ಪೂಜೆ ನೆರವೇರಿಸಲು ತನ್ನ ಚಿಕ್ಕಪ್ಪನನ್ನೇ ಕರೆದಿದ್ದಾನೆ…! ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಯುವಕ ಹಾಗೂ ಸ್ಥಳೀಯ ಚಿನ್ನದ ವ್ಯಾಪಾರಿಯೊಬ್ಬನನ್ನು ಬಂಧಿಸಿದ್ದಾರೆ.
ಈ ಘಟನೆ ಮಹಾರಾಷ್ಟ್ರದ ಕೊಲ್ಲಾಪುರ ಜಿಲ್ಲೆಯ ಸಾತ್ವೆ (Satve) ಗ್ರಾಮದಲ್ಲಿ ನಡೆದಿದೆ. ಆರೋಪಿಯನ್ನು ಸಮರ ಪೋಪಟ್ ಚವಾಣ ಎಂದು ಗುರುತಿಸಲಾಗಿದೆ. ಈತ ತನ್ನ ಚಿಕ್ಕಪ್ಪ ಉಮೇಶ ಮಾರುತಿ ಚವಾಣ ಅವರ ಮನೆಯಿಂದ ಸುಮಾರು ಒಂದು ತಿಂಗಳ ಹಿಂದೆ ಚಿನ್ನಾಭರಣಗಳನ್ನು ಕದ್ದಿದ್ದಾನೆ ಎನ್ನಲಾಗಿದೆ. ಉಮೇಶ ಅವರ ಮನೆಯೂ ಸಮರ್‌ನ ಮನೆಯ ಸಮೀಪದಲ್ಲೇ ಇದೆ.
ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ, ಸಮರ ತನ್ನ ಚಿಕ್ಕಪ್ಪನ ಮನೆಯಲ್ಲಿದ್ದ 15 ತೊಲೆ ಚಿನ್ನಾಭರಣಗಳನ್ನು ಕದ್ದು, ಸ್ಥಳೀಯ ಚಿನ್ನದ ವ್ಯಾಪಾರಿ ಸಂಗ್ರಮ ಬಾಬಾಸೋ ಮೋರೆ ಅವರ ಸಹಾಯದಿಂದ ಅವುಗಳನ್ನು ₹10 ಲಕ್ಷಕ್ಕೆ ಮಾರಾಟ ಮಾಡಿದ್ದಾನೆ ಎಂದು ಆರೋಪಿಸಲಾಗಿದೆ. ಬಳಿಕ ಆ ಹಣವನ್ನು ಬಳಸಿ ಹೊಸ ಮಹೀಂದ್ರಾ ಥಾರ್ ಎಸ್‌ಯುವಿಯನ್ನು ಖರೀದಿಸಿದ್ದಾನೆ.
ಹೊಸ ಥಾರ್‌ಗೆ ಪೂಜೆ ಮಾಡಲು ಚಿಕ್ಕಪ್ಪನಿಗೇ ಆಹ್ವಾನ !
ಹೊಸ ವಾಹನವನ್ನು ಮನೆಗೆ ತಂದ ಸಮರ, ಅದಕ್ಕೆ ಆಯೋಜಿಸಿದ್ದ ಪೂಜಾ ಕಾರ್ಯಕ್ರಮಕ್ಕೆ ತನ್ನ ಚಿಕ್ಕಪ್ಪನನ್ನೂ ಆಹ್ವಾನಿಸಿದ್ದಾನೆ. ಆದರೆ, ಈ ಸಂಭ್ರಮದ ನಡುವೆಯೇ ಪ್ರಕರಣಕ್ಕೆ ಅನಿರೀಕ್ಷಿತ ತಿರುವು ಸಿಕ್ಕಿದೆ.
ಉಮೇಶ ತಮ್ಮ ಮನೆಯಲ್ಲಿದ್ದ ಚಿನ್ನಾಭರಣಗಳನ್ನು ಹುಡುಕಲು ಹೋದಾಗ ಅವು ಕಾಣೆಯಾಗಿರುವುದು ಗೊತ್ತಾಗಿದೆ. ಉಮೇಶ ಹಾಗೂ ಅವರ ಪತ್ನಿಗೆ ಸೇರಿದ ಆಭರಣಗಳು ನಾಪತ್ತೆಯಾಗಿದ್ದವು. ಆದರೆ, ಅದೇ ಸ್ಥಳದ ಸಮೀಪದಲ್ಲಿ ಇಡಲಾಗಿದ್ದ ಅವರ ಅಜ್ಜಿಯ ಚಿನ್ನಾಭರಣಗಳು ಮಾತ್ರ ಹಾಗೆಯೇ ಉಳಿದಿದ್ದವು.
ನಿರ್ದಿಷ್ಟ ವ್ಯಕ್ತಿಗಳಿಗೆ ಸೇರಿದ ಆಭರಣಗಳು ಮಾತ್ರ ಕಳವಾಗಿದ್ದು, ಮನೆಯ ವ್ಯವಸ್ಥೆ ಮತ್ತು ಆಭರಣಗಳನ್ನು ಇಟ್ಟಿದ್ದ ಸ್ಥಳದ ಬಗ್ಗೆ ತಿಳಿದಿರುವ ವ್ಯಕ್ತಿಯೇ ಕೃತ್ಯ ಎಸಗಿರಬಹುದು ಎಂಬ ಅನುಮಾನ ಮೂಡಿದೆ ಎಂದು ಪ್ರಕರಣದ ವಿವರಗಳಿಂದ ತಿಳಿದುಬಂದಿದೆ.
ಪೊಲೀಸರ ತನಿಖೆಯಲ್ಲಿ ಸಿಕ್ಕ ಸುಳಿವು
ಆಭರಣಗಳು ನಾಪತ್ತೆಯಾಗಿರುವ ಕುರಿತು ಉಮೇಶ್ ಅವರು ಪೊಲೀಸರ ಕ್ರಮಕ್ಕೆ ಎರಡು ದಿನಗಳ ಮೊದಲು ಕೊಲ್ಹಾಪುರ ಜಿಲ್ಲೆಯ ಕೊಡೋಲಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ದೂರಿನ ಆಧಾರದ ಮೇಲೆ ಪೊಲೀಸರು ತನಿಖೆ ಆರಂಭಿಸಿದರು. ತನಿಖೆಯ ವೇಳೆ ಸಮರ ಇತ್ತೀಚೆಗೆ ದುಬಾರಿ ವಾಹನವನ್ನು ಖರೀದಿಸಿರುವುದು ಪೊಲೀಸರ ಗಮನಕ್ಕೆ ಬಂದಿದೆ. ಅಷ್ಟೊಂದು ಹಣ ಆತನಿಗೆ ಹೇಗೆ ಲಭಿಸಿತು ಎಂಬ ಅನುಮಾನದಿಂದ ಪೊಲೀಸರು ವಿಚಾರಣೆ ನಡೆಸಿದ್ದಾರೆ. ಹೆಚ್ಚಿನ ವಿಚಾರಣೆಯ ಸಂದರ್ಭದಲ್ಲಿ ಈತ ಚಿನ್ನಾಭರಣಗಳನ್ನು ಕದ್ದಿರುವುದಾಗಿ ಒಪ್ಪಿಕೊಂಡಿದ್ದಾನೆ ಎಂದು ವರದಿಯಾಗಿದೆ.
ಯುವಕ ಮತ್ತು ಚಿನ್ನದ ವ್ಯಾಪಾರಿ ಬಂಧನ..
ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಸಮರ ಪೋಪಟ್ ಚವಾಣ ಹಾಗೂ ಚಿನ್ನದ ವ್ಯಾಪಾರಿ ಸಂಗ್ರಾಮ ಬಾಬಾಸೋ ಮೋರೆ ಅವರನ್ನು ವಶಕ್ಕೆ ಪಡೆದು ಬಂಧಿಸಿದ್ದಾರೆ. ಚಿನ್ನಾಭರಣಗಳ ಕಳವು, ಅವುಗಳ ಮಾರಾಟ ಹಾಗೂ ಮಾರಾಟದಿಂದ ಬಂದ ಹಣವನ್ನು ಹೇಗೆ ಬಳಸಲಾಗಿದೆ ಎಂಬುದರ ಕುರಿತು ಪೊಲೀಸರು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ. ಕಳವು ಮಾಡಿದ ಆಭರಣಗಳ ಮಾರಾಟದಲ್ಲಿ ಇಬ್ಬರ ಪಾತ್ರವೇನು, ಹಣದ ವಹಿವಾಟು ಹೇಗೆ ನಡೆದಿದೆ ಮತ್ತು ಘಟನೆಯ ಸಂಪೂರ್ಣ ಸರಣಿ ಏನು ಎಂಬುದನ್ನು ಮುಂದಿನ ತನಿಖೆಯಲ್ಲಿ ಖಚಿತಪಡಿಸಿಕೊಳ್ಳಬೇಕಿದೆ.
ಒಟ್ಟಿನಲ್ಲಿ, ಮಾವನ ಮನೆಯ ಚಿನ್ನಾಭರಣಗಳನ್ನೇ ಕದ್ದು ಥಾರ್ ಖರೀದಿಸಿದ ಆರೋಪ ಎದುರಿಸುತ್ತಿರುವ ಯುವಕ, ಹೊಸ ವಾಹನದ ಪೂಜೆಗೆ ಮಾವನನ್ನೇ ಆಹ್ವಾನಿಸಿದ ಘಟನೆ ಇದೀಗ ಕೊಲ್ಲಾಪುರ ಜಿಲ್ಲೆಯಲ್ಲಿ ಗಮನ ಸೆಳೆದಿದೆ. ಪ್ರಕರಣದ ಸಂಪೂರ್ಣ ವಿವರಗಳು ಪೊಲೀಸ್ ತನಿಖೆಯ ಬಳಿಕ ಇನ್ನಷ್ಟು ಸ್ಪಷ್ಟವಾಗಬೇಕಿದೆ.
,
