ಬೆಳಗಾವಿ : ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು (ಎಂಎಸ್‌ಎಂಇ) ಸುಸ್ಥಿರ ಬೆಳವಣಿಗೆ ಸಾಧಿಸಲು ಸ್ಪಷ್ಟ ದೂರದೃಷ್ಟಿ, ಪರಿಣಾಮಕಾರಿ ನಾಯಕತ್ವ, ನವೀನ ಚಿಂತನೆ ಹಾಗೂ ಸೂಕ್ತ ಬಂಡವಾಳ ನಿರ್ವಹಣೆ ಅತ್ಯಗತ್ಯ ಎಂದು ಬೆಳಗಾವಿ ವಾಣಿಜ್ಯೋದ್ಯಮ ಸಂಘದ (ಬಿಸಿಸಿಐ) ಅಧ್ಯಕ್ಷ ಸ್ವಪ್ನಿಲ್ ಶಾ ಹೇಳಿದರು.
ಕೆಎಲ್‌ಎಸ್ ಇನ್‌ಸ್ಟಿಟ್ಯೂಟ್ ಆಫ್ ಮ್ಯಾನೇಜ್‌ಮೆಂಟ್ ಎಜುಕೇಶನ್ ಆ್ಯಂಡ್ ರಿಸರ್ಚ್ (ಕೆಎಲ್‌ಎಸ್-ಐಎಂಇಆರ್), ಬೆಳಗಾವಿ ಹಾಗೂ ಬಿಸಿಸಿಐ ಸಹಯೋಗದಲ್ಲಿ ಅ.28ರಂದು ಆಯೋಜಿಸಿದ್ದ ‘ರೆಡಿ ಫಾರ್ ದ ಲೀಪ್? – ಸುಸ್ಥಿರ ಎಂಎಸ್‌ಎಂಇ ಬೆಳವಣಿಗೆಗೆ ದೂರದೃಷ್ಟಿ, ಮನೋಭಾವ ಮತ್ತು ಬಂಡವಾಳದ ಸಮನ್ವಯ’ ಎಂಬ ನಾಯಕತ್ವ ಅಭಿವೃದ್ಧಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ಉದ್ಯಮಶೀಲತೆಯನ್ನು ಉತ್ತೇಜಿಸುವುದು, ನಾಯಕತ್ವದ ಗುಣಗಳನ್ನು ಬೆಳೆಸುವುದು ಹಾಗೂ ಉದ್ಯಮಗಳಲ್ಲಿ ನಾವೀನ್ಯತೆಗೆ ಆದ್ಯತೆ ನೀಡುವುದು ಇಂದಿನ ಅಗತ್ಯವಾಗಿದೆ. ಉದ್ಯಮಗಳ ಬೆಳವಣಿಗೆಗೆ ಶೈಕ್ಷಣಿಕ ಸಂಸ್ಥೆಗಳು ಮತ್ತು ಕೈಗಾರಿಕಾ ವಲಯದ ನಡುವೆ ಪರಿಣಾಮಕಾರಿ ಸಹಯೋಗ ಇರಬೇಕು. ಇಂತಹ ಸಹಭಾಗಿತ್ವವು ಉದ್ಯಮಶೀಲ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವುದರ ಜತೆಗೆ ಹೊಸ ಉದ್ಯಮಾವಕಾಶಗಳ ಸೃಷ್ಟಿಗೂ ನೆರವಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಬಿಸಿಸಿಐ–ಕೆಎಲ್‌ಎಸ್-ಐಎಂಇಆರ್ ನಡುವೆ ಒಡಂಬಡಿಕೆ
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿದ್ದ ಬಿಸಿಸಿಐ ಮತ್ತು ಕೆಎಲ್‌ಎಸ್-ಐಎಂಇಆರ್ ನಡುವಿನ ತಿಳಿವಳಿಕೆ ಒಪ್ಪಂದಕ್ಕೆ (ಎಂಒಯು) ಸಹಿ ಹಾಕಲಾಯಿತು.
ಕೈಗಾರಿಕೆ ಮತ್ತು ಶಿಕ್ಷಣ ಸಂಸ್ಥೆಗಳ ನಡುವಿನ ಸಹಯೋಗವನ್ನು ಬಲಪಡಿಸುವುದು, ಜ್ಞಾನ ವಿನಿಮಯ, ಉದ್ಯಮ ಕ್ಷೇತ್ರದೊಂದಿಗಿನ ಸಂವಾದ, ಉದ್ಯಮಶೀಲತೆ ಹಾಗೂ ವೃತ್ತಿಪರ ಅಭಿವೃದ್ಧಿಗೆ ಅವಕಾಶ ಕಲ್ಪಿಸುವುದು ಈ ಒಡಂಬಡಿಕೆಯ ಉದ್ದೇಶವಾಗಿದೆ.
ಎಂಎಸ್‌ಎಂಇಗಳ ಬೆಳವಣಿಗೆ, ನಾಯಕತ್ವ ವಿಕಸನ ಮತ್ತು ಪ್ರಾಯೋಗಿಕ ಕಲಿಕೆಗೆ ಪೂರಕವಾದ ಉಪಕ್ರಮಗಳನ್ನು ಕೈಗೊಳ್ಳಲು ಈ ಸಹಭಾಗಿತ್ವ ನೆರವಾಗಲಿದೆ.
ಉದ್ಯಮ ಬೆಳವಣಿಗೆಗೆ ತಜ್ಞರ ಮಾರ್ಗದರ್ಶನ
ಕಾರ್ಯಕ್ರಮದಲ್ಲಿ ಉದ್ಯಮ ಕ್ಷೇತ್ರದ ತಜ್ಞರಾದ ಬಾಂಬೆ ಚೇಂಬರ್ ಆಫ್ ಕಾಮರ್ಸ್ ಆ್ಯಂಡ್ ಇಂಡಸ್ಟ್ರಿಯ ಎಂಎಸ್‌ಎಂಇ ಸಮಿತಿ ಸಹ-ಅಧ್ಯಕ್ಷ ಹಾಗೂ ಐರಾ ಕನ್ಸಲ್ಟಿಂಗ್ ಸಂಸ್ಥೆಯ ಸಂಸ್ಥಾಪಕ ನಿರ್ದೇಶಕ ಆರ್. ಶ್ರೀನಿವಾಸನ್, ಹಣಕಾಸು, ಕಾರ್ಪೊರೇಟ್ ಫೈನಾನ್ಸ್, ಉತ್ಪಾದನೆ ಮತ್ತು ಸೇವಾ ವಲಯದಲ್ಲಿ 35 ವರ್ಷಕ್ಕೂ ಅಧಿಕ ಅನುಭವ ಹೊಂದಿರುವ ರಾಜೇಂದ್ರ ಚಂದ್ರ ಹಾಗೂ ಮುಂಬೈನ ಫಾರ್ಮರ್ಟ್ರಾನ್ ಎಂಜಿನಿಯರಿಂಗ್ (ಇಂಡಿಯಾ) ಪ್ರೈವೇಟ್ ಲಿಮಿಟೆಡ್ ಸಂಸ್ಥಾಪಕ ವಿನಯ್ ಶರ್ಮಾ ಸಂಪನ್ಮೂಲ ವ್ಯಕ್ತಿಗಳಾಗಿ ಭಾಗವಹಿಸಿದ್ದರು.
ವ್ಯವಹಾರ ತಂತ್ರಗಾರಿಕೆ, ಹಣಕಾಸು ಯೋಜನೆ, ಬಂಡವಾಳ ನಿರ್ವಹಣೆ, ನಾಯಕತ್ವದ ಮನೋಭಾವ, ಮಾನವ ಸಂಪನ್ಮೂಲ ನಿರ್ವಹಣೆ ಹಾಗೂ ಎಂಎಸ್‌ಎಂಇಗಳು ಮುಂದಿನ ಬೆಳವಣಿಗೆಯ ಹಂತ ತಲುಪುವಾಗ ಎದುರಿಸುವ ಸವಾಲುಗಳ ಕುರಿತು ತಜ್ಞರು ಮಾರ್ಗದರ್ಶನ ನೀಡಿದರು.
ತಮ್ಮ ಉದ್ಯಮ ಅನುಭವಗಳನ್ನು ಹಂಚಿಕೊಂಡ ಸಂಪನ್ಮೂಲ ವ್ಯಕ್ತಿಗಳು, ಅವಕಾಶಗಳನ್ನು ಗುರುತಿಸುವುದು, ಸವಾಲುಗಳನ್ನು ಎದುರಿಸುವುದು ಮತ್ತು ಸುಸ್ಥಿರ ವಿಸ್ತರಣೆಗೆ ಯೋಜನೆ ರೂಪಿಸುವ ಕುರಿತು ಪ್ರಾಯೋಗಿಕ ಒಳನೋಟಗಳನ್ನು ನೀಡಿದರು.
ಕೆಎಲ್‌ಎಸ್-ಐಎಂಇಆರ್ ನಿರ್ದೇಶಕ ಡಾ. ಆರಿಫ್ ಶೇಖ್ ಅವರ ಪ್ರೋತ್ಸಾಹ, ಮಾರ್ಗದರ್ಶನ ಹಾಗೂ ಸಂಸ್ಥೆಯ ಸಹಕಾರದಲ್ಲಿ ಕಾರ್ಯಕ್ರಮ ಯಶಸ್ವಿಯಾಗಿ ಆಯೋಜಿಸಲಾಯಿತು.
ಬಿಸಿಸಿಐ ಹಿರಿಯ ಉಪಾಧ್ಯಕ್ಷ ಉದಯ ಜೋಶಿ, ಕಾರ್ಯಕ್ರಮ ಸಮಿತಿ ಅಧ್ಯಕ್ಷ ಬಸವರಾಜ ರಾಂಪುರೆ, ಕೈಗಾರಿಕಾ ಸಮಿತಿ ಅಧ್ಯಕ್ಷ ರಾಜೇಶ್ ಮುಚಂಡಿಕರ್ ಹಾಗೂ ನಿರ್ದೇಶಕಿ ಅನಿತಾ ಕಣಬರ್ಗಿ ಉಪಸ್ಥಿತರಿದ್ದರು.
,
