ಇನ್ನೊಂದು ಅವಧಿ ಬೇಡ’ ಎಂದು ರಾಜೀನಾಮೆ ನೀಡಿದ್ದ ಚಂದ್ರಶೇಖರನ್‌ ಅಧ್ಯಕ್ಷರಾಗಿ ಮತ್ತೆ ಮರುನೇಮಕ ; ಟಾಟಾ ಸನ್ಸ್‌ನಲ್ಲಿ ನಡೆದದ್ದಾದ್ರೂ ಏನು?

ಮುಂಬೈ: ಟಾಟಾ ಸಮೂಹದ ಹೋಲ್ಡಿಂಗ್ ಕಂಪನಿಯಾದ ಟಾಟಾ ಸನ್ಸ್‌ನಲ್ಲಿ ಅಧ್ಯಕ್ಷರ ಮರುನೇಮಕ ಮತ್ತು ಕಂಪನಿಯ ಭವಿಷ್ಯದ ಲಿಸ್ಟಿಂಗ್ ವಿಚಾರಕ್ಕೆ ಸಂಬಂಧಿಸಿದಂತೆ ಭಿನ್ನಾಭಿಪ್ರಾಯಗಳು ತೀವ್ರಗೊಂಡಿವೆ. ಟಾಟಾ ಸನ್ಸ್ ಮಂಡಳಿಯು ಗುರುವಾರ ಎನ್. ಚಂದ್ರಶೇಖರನ್ ಅವರಿಗೆ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ (Executive Chairman) ಐದು ವರ್ಷಗಳ ಅವಧಿಗೆ ಮರುನೇಮಕ ಮಾಡಲು ಅನುಮೋದನೆ ನೀಡಿದ ಬೆನ್ನಲ್ಲೇ, ಟಾಟಾ ಟ್ರಸ್ಟ್‌ಗಳ ಅಧ್ಯಕ್ಷ ನೋಯೆಲ್ ಟಾಟಾ ಈ ನಿರ್ಧಾರವನ್ನು ವಿರೋಧಿಸಿ ಅದು “ಕಾನೂನುಬಾಹಿರ” ಎಂದು ಹೇಳಿದ್ದಾರೆ.
ಟಾಟಾ ಸನ್ಸ್ ಮಂಡಳಿಯು ಗುರುವಾರ ಬಿಡುಗಡೆ ಮಾಡಿದ ಪ್ರಕಟಣೆಯಲ್ಲಿ, ಎನ್. ಚಂದ್ರಶೇಖರನ್ ಅವರ ನಾಯಕತ್ವವನ್ನು ಮೆಚ್ಚಿ ಅವರನ್ನು ಮತ್ತೆ ಐದು ವರ್ಷಗಳ ಅವಧಿಗೆ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಮರುನೇಮಕ ಮಾಡುವಂತೆ ಟಾಟಾ ಟ್ರಸ್ಟ್‌ಗಳು ಶಿಫಾರಸು ಮಾಡಿದ್ದವು ಎಂದು ತಿಳಿಸಿದೆ.
“2017ರಿಂದ ಟಾಟಾ ಸಮೂಹಕ್ಕೆ ನೀಡಿರುವ ನಾಯಕತ್ವವನ್ನು ಪರಿಗಣಿಸಿ, ಚಂದ್ರಶೇಖರನ್ ಅವರ ಪ್ರಸ್ತುತ ಅವಧಿ ಮುಗಿದ ಬಳಿಕ ಅವರನ್ನು ಮತ್ತೊಂದು ಐದು ವರ್ಷಗಳ ಅವಧಿಗೆ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಮರುನೇಮಕ ಮಾಡಬೇಕು ಎಂದು ಟಾಟಾ ಟ್ರಸ್ಟ್‌ಗಳು ನಿರ್ಣಯ ಕೈಗೊಂಡಿದ್ದವು” ಎಂದು ಪ್ರಕಟಣೆಯಲ್ಲಿ ಹೇಳಲಾಗಿದೆ.
2017ರಿಂದ ಆರಂಭವಾದ ಬೆಳವಣಿಗೆ
ಎನ್. ಚಂದ್ರಶೇಖರನ್ ಅವರು 2017ರಲ್ಲಿ ಮೊದಲ ಬಾರಿಗೆ ಟಾಟಾ ಸನ್ಸ್ ಅಧ್ಯಕ್ಷರಾಗಿ ನೇಮಕಗೊಂಡಿದ್ದರು. ಬಳಿಕ 2022ರಲ್ಲಿ ಅವರಿಗೆ ಎರಡನೇ ಐದು ವರ್ಷಗಳ ಅವಧಿ ದೊರೆತಿದ್ದು, ಅದು 2027ರ ಫೆಬ್ರವರಿ 20ರಂದು ಕೊನೆಗೊಳ್ಳಬೇಕಿದೆ.
2025ರ ಜುಲೈನಲ್ಲಿ ಟಾಟಾ ಟ್ರಸ್ಟ್‌ಗಳು ಅವರಿಗೆ ಮತ್ತೊಂದು ಐದು ವರ್ಷಗಳ ಅವಧಿ ನೀಡುವ ಶಿಫಾರಸಿಗೆ ಒಪ್ಪಿಗೆ ಸೂಚಿಸಿದ್ದವು.ಆದರೆ 2026ರ ಫೆಬ್ರವರಿ 24ರಂದು ಈ ಶಿಫಾರಸು ಟಾಟಾ ಸನ್ಸ್ ಮಂಡಳಿಯ ಮುಂದೆ ಬಂದಾಗ, ಚಂದ್ರಶೇಖರನ್ ಅವರ ಅವಧಿಯಲ್ಲಿ ಆರಂಭವಾದ ಇ-ಕಾಮರ್ಸ್, ವಿಮಾನಯಾನ ಹಾಗೂ ಸೆಮಿಕಂಡಕ್ಟರ್ ಸೇರಿದಂತೆ ಕೆಲವು ಹೊಸ ವ್ಯವಹಾರಗಳ ಕಾರ್ಯಕ್ಷಮತೆ ಕುರಿತು ಸ್ಪಷ್ಟ ಮಾರ್ಗಸೂಚಿ ಬೇಕೆಂದು ನೋಯೆಲ್ ಟಾಟಾ ಒತ್ತಾಯಿಸಿದರು. ಈ ಹಿನ್ನೆಲೆಯಲ್ಲಿ ಪ್ರಸ್ತಾವನೆ ಮುಂದಕ್ಕೆ ಸಾಗಲಿಲ್ಲ ಎಂದು ಮೂಲಗಳು ತಿಳಿಸಿವೆ.
ಮರುನೇಮಕಕ್ಕೆ ಬೆಂಬಲದ ಕೊರತೆ; ರಾಜೀನಾಮೆ ನಿರ್ಧಾರ
12 ಆಗಸ್ಟ್ 2026 ರಂದು: ಉಪ್ಪಿನಿಂದ ಸಾಫ್ಟ್‌ವೇರ್ ವರೆಗಿನ ವಹಿವಾಟು ನಡೆಸುವ ಈ ಬೃಹತ್ ಸಮೂಹದ (conglomerate) ಹೋಲ್ಡಿಂಗ್ ಕಂಪನಿಯ ಮಂಡಳಿಯಿಂದ ತಮ್ಮ ಮರುನೇಮಕಾತಿಗೆ ಸರ್ವಾನುಮತದ ಬೆಂಬಲ ಸಿಗಲಿಲ್ಲ ಎಂಬ ಕಾರಣ ನೀಡಿ, ಪ್ರಸ್ತುತ ಅವಧಿ ಮುಗಿದ ನಂತರ ಟಾಟಾ ಸನ್ಸ್‌ನ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಯಲು ನಿರ್ಧರಿಸಿರುವುದಾಗಿ ಚಂದ್ರಶೇಖರನ್ ಹೇಳಿದರು.
ತಮ್ಮ ರಾಜೀನಾಮೆ ಪತ್ರದಲ್ಲಿ, ಮರುನೇಮಕಾತಿ ಪ್ರಸ್ತಾವನೆಗೆ ಮಂಡಳಿಯಿಂದ ಸರ್ವಾನುಮತದ ಬೆಂಬಲ ಸಿಗದ ಕಾರಣದಿಂದಾಗಿ ಮತ್ತೊಂದು ಅವಧಿಯನ್ನು ಬಯಸದಿರುವ ನಿರ್ಧಾರವನ್ನು ತೆಗೆದುಕೊಂಡಿರುವುದಾಗಿ ಚಂದ್ರಶೇಖರನ್ ತಿಳಿಸಿದರು. “ಟಾಟಾ ಸನ್ಸ್‌ನ ಅಧ್ಯಕ್ಷರಾಗಿ ನನ್ನ ಪ್ರಸ್ತುತ ಅಧಿಕಾರಾವಧಿಯು 2027ರ ಫೆಬ್ರವರಿ 20ರಂದು ಕೊನೆಗೊಳ್ಳಲಿದೆ. ಸರ್ ದೊರಾಬ್ಜಿ ಟಾಟಾ ಟ್ರಸ್ಟ್ ಮತ್ತು ಸರ್ ರತನ್ ಟಾಟಾ ಟ್ರಸ್ಟ್ ನನ್ನ ಮುಂದಿನ ಅವಧಿಯನ್ನು ಐದು ವರ್ಷಗಳವರೆಗೆ ವಿಸ್ತರಿಸಲು ಸರ್ವಾನುಮತದಿಂದ ನಿರ್ಣಯಿಸಿ ಶಿಫಾರಸು ಮಾಡಿದ್ದವು; ಈ ವಿಷಯವನ್ನು ಟಾಟಾ ಸನ್ಸ್‌ನ ನಾಮನಿರ್ದೇಶನ ಮತ್ತು ಸಂಭಾವನೆ ಸಮಿತಿ ಹಾಗೂ ಮಂಡಳಿಯು ದಾಖಲಿಸಿ ಶಿಫಾರಸು ಮಾಡಿದ್ದವು,” ಎಂದು ಚಂದ್ರಶೇಖರನ್ ತಮ್ಮ ಪತ್ರದಲ್ಲಿ ಬರೆದಿದ್ದಾರೆ.
“ನಂತರ, 2026ರ ಫೆಬ್ರವರಿ 24ರಂದು ಟಾಟಾ ಸನ್ಸ್ ಮಂಡಳಿಯ ಮುಂದೆ ಈ ನಿರ್ಣಯವನ್ನು ಮಂಡಿಸಲಾಯಿತು. ಆದರೆ, ಮಂಡಳಿಯ ಒಬ್ಬ ಸದಸ್ಯರು ಇದಕ್ಕೆ ಬೆಂಬಲ ನೀಡದ ಕಾರಣ ಪ್ರಸ್ತಾವನೆಯು ಅಂಗೀಕಾರವಾಗಲಿಲ್ಲ. ಸರ್ವಾನುಮತದ ಬೆಂಬಲವಿಲ್ಲದಿದ್ದರಿಂದ, ನಾನು ಈ ನಿರ್ಧಾರವನ್ನು ಮುಂದೂಡಲು ನಿರ್ಧರಿಸಿದೆ,” ಎಂದು ಅವರು ಹೇಳಿದರು.
ಎಜಿಎಂ ಮುಂದೂಡಿಕೆ, ಮರುಪರಿಶೀಲನೆಗೆ ಮನವಿ
2026ರ ಆಗಸ್ಟ್ 18ರಂದು ಚಂದ್ರಶೇಖರನ್ ಅವರನ್ನು ನಿರ್ದೇಶಕರಾಗಿ ಮರುನೇಮಕ ಮಾಡಲು ಮತದಾನ ನಡೆಸಬೇಕಿದ್ದ ಟಾಟಾ ಸನ್ಸ್ ವಾರ್ಷಿಕ ಸಾಮಾನ್ಯ ಸಭೆ (AGM) ಕೋರಂ ಕೊರತೆಯಿಂದ ಮುಂದೂಡಲ್ಪಟ್ಟಿತು.
ನಂತರ ಸೆಪ್ಟೆಂಬರ್ 3ರಂದು ನಡೆದ ನಾಮನಿರ್ದೇಶನ ಮತ್ತು ವೇತನ ಸಮಿತಿ ಸಭೆಯಲ್ಲಿ, ಟಾಟಾ ಸಮೂಹದ ಹಿತಾಸಕ್ತಿ ಹಾಗೂ ಚಂದ್ರಶೇಖರನ್ ಅವರ ಕೊಡುಗೆಗಳನ್ನು ಪರಿಗಣಿಸಿ ತಮ್ಮ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಅವರನ್ನು ಸರ್ವಾನುಮತದಿಂದ ಕೋರಲಾಯಿತು.
ಆರ್‌ಬಿಐ ನಿರ್ಧಾರದಿಂದ ಲಿಸ್ಟಿಂಗ್ ಚರ್ಚೆ
ಈ ನಡುವೆ ಸೆಪ್ಟೆಂಬರ್ 11ರಂದು ಭಾರತೀಯ ರಿಸರ್ವ್ ಬ್ಯಾಂಕ್ (RBI), ಟಾಟಾ ಸನ್ಸ್‌ ಅನ್ನು ಎನ್‌ಬಿಎಫ್‌ಸಿ (NBFC) ಚೌಕಟ್ಟಿನಿಂದ ಹೊರಗಿಡುವ ಕಂಪನಿಯ ಮನವಿಯನ್ನು ತಿರಸ್ಕರಿಸಿತು. ಇದರ ಪರಿಣಾಮವಾಗಿ ಕಂಪನಿಯು ಲಿಸ್ಟಿಂಗ್ ಪ್ರಕ್ರಿಯೆಯನ್ನು ಮುಂದುವರಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಯಿತು.
ಟಾಟಾ ಸನ್ಸ್ ಖಾಸಗಿ ಕಂಪನಿಯಾಗಿಯೇ ಮುಂದುವರಿಯಲು ಬಯಸಿತ್ತು. ಆದರೆ ಚಂದ್ರಶೇಖರನ್ ಅವರ ಮರುನೇಮಕದೊಂದಿಗೆ, ಗುಂಪಿನ ಹೋಲ್ಡಿಂಗ್ ಕಂಪನಿಯನ್ನು ಷೇರು ಮಾರುಕಟ್ಟೆಯಲ್ಲಿ ಪಟ್ಟಿ ಮಾಡುವ ಪ್ರಕ್ರಿಯೆಯೂ ಆರಂಭವಾಗಿದೆ ಎಂದು ಹೇಳಲಾಗಿದೆ.
ಲಿಸ್ಟಿಂಗ್‌ಗೆ ನೋಯೆಲ್ ಟಾಟಾ ವಿರೋಧ
ಆದರೆ ಟಾಟಾ ಸನ್ಸ್ ಸಾರ್ವಜನಿಕವಾಗಿ ಲಿಸ್ಟಿಂಗ್‌ ಆಗುವುದಕ್ಕೆ ನೋಯೆಲ್ ಟಾಟಾ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ ಎಂದು ಹೇಳಲಾಗಿದೆ.
ಸೆಪ್ಟೆಂಬರ್ 17ರಂದು ನಡೆದ ಮಂಡಳಿ ಸಭೆಯಲ್ಲಿ ಅವರು, ದೇಶದ ಅತಿ ಹೆಚ್ಚು ಆದಾಯ ಹೊಂದಿರುವ ಕಂಪನಿಯನ್ನು ಷೇರು ಮಾರುಕಟ್ಟೆಯಲ್ಲಿ ಪಟ್ಟಿ ಮಾಡುವ ಯಾವುದೇ ನಿರ್ಧಾರವನ್ನು ತಾವು ತಡೆಯುವುದಾಗಿ ತಿಳಿಸಿದ್ದಾರೆ. ಅಗತ್ಯವಿದ್ದರೆ ಆರ್‌ಬಿಐ ಬಳಿ ನಿಯಮ ಪಾಲನೆಗೆ ಕನಿಷ್ಠ ಮೂರು ವರ್ಷಗಳ ಕಾಲಾವಕಾಶ ಕೇಳಬೇಕೆಂದು ಅವರು ಸಲಹೆ ನೀಡಿದ್ದಾರೆ.
“ನನ್ನನ್ನು ಮತ ಚಲಾಯಿಸಲು ಒತ್ತಾಯಿಸಿದರೆ, ಲಿಸ್ಟಿಂಗ್ ನಿರ್ಧಾರಕ್ಕೆ ನಾನು ವೀಟೋ ಹಾಕುವುದನ್ನು ಬಿಟ್ಟರೆ ಬೇರೆ ಆಯ್ಕೆ ಇರುವುದಿಲ್ಲ. ಲಿಸ್ಟಿಂಗ್ ಎಂಬುದು ಕಂಪನಿಯ ಮೂಲ ಸ್ವರೂಪವನ್ನೇ ಹಾಳುಮಾಡುತ್ತದೆ ಮತ್ತು ಅದರ ತತ್ವಗಳಿಗೆ ಹೊಡೆತ ನೀಡುತ್ತದೆ” ಎಂದು ನೋಯೆಲ್ ಮಂಡಳಿಗೆ ತಿಳಿಸಿದ್ದಾಗಿ ಟಾಟಾ ಟ್ರಸ್ಟ್‌ಗಳು ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ.
ಹಾಗೆಯೇ, ದಿವಂಗತ ರತನ್ ಟಾಟಾ ನೇತೃತ್ವದ ಮಂಡಳಿಯು ಟಾಟಾ ಸನ್ಸ್ ಅನ್ನು “ಲಿಸ್ಟಿಂಗ್‌ ಮಾಡದ ಕಂಪನಿ”ಯಾಗಿಯೇ ಉಳಿಸಬೇಕೆಂದು ಸರ್ವಾನುಮತದಿಂದ ನಿರ್ಧರಿಸಿತ್ತು ಎಂದೂ ಅವರು ಹೇಳಿದ್ದಾರೆ.
ಚಂದ್ರಶೇಖರನ್ ಮರುನೇಮಕಕ್ಕೆ ಅನುಮೋದನೆ
ಈ ಎಲ್ಲ ಬೆಳವಣಿಗೆಗಳ ನಡುವೆಯೇ ಸೆಪ್ಟೆಂಬರ್ 17ರಂದು ನಡೆದ ಸಭೆಯಲ್ಲಿ ಟಾಟಾ ಸನ್ಸ್ ಮಂಡಳಿಯು ಚಂದ್ರಶೇಖರನ್ ಅವರಿಗೆ ಮತ್ತೊಂದು ಐದು ವರ್ಷಗಳ ಅವಧಿಗೆ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಮರುನೇಮಕ ನೀಡುವ ನಿರ್ಣಯವನ್ನು ಬಹುಮತದೊಂದಿಗೆ ಅಂಗೀಕರಿಸಿತು. ಈ ಪ್ರಸ್ತಾವನೆಗೆ ನೋಯೆಲ್ ಟಾಟಾ ವಿರೋಧವಾಗಿ ಮತ ಚಲಾಯಿಸಿದ್ದರು.
“ಮರುನೇಮಕ ಕಾನೂನುಬಾಹಿರ” : ಟಾಟಾ ಟ್ರಸ್ಟ್‌ಗಳು
ಮಂಡಳಿಯ ನಿರ್ಧಾರದ ಬಳಿಕ ಟಾಟಾ ಟ್ರಸ್ಟ್‌ಗಳು ಪ್ರತ್ಯೇಕ ಹೇಳಿಕೆ ಬಿಡುಗಡೆ ಮಾಡಿ, ಚಂದ್ರಶೇಖರನ್ ಮರುನೇಮಕ ಸಂಬಂಧದ ನಿರ್ಣಯವು “ಕಾನೂನುಬದ್ಧವಾಗಿ ಅಮಾನ್ಯ” (Legal Nullity) ಎಂದು ವಾದಿಸಿವೆ.
ಟಾಟಾ ಸನ್ಸ್‌ನ ಸಂಘಟನೆ ನಿಯಮಾವಳಿಗಳ (Articles of Association) ಪ್ರಕಾರ ಅಧ್ಯಕ್ಷರ ನೇಮಕ ಅಥವಾ ಮರುನೇಮಕಕ್ಕೆ ಟ್ರಸ್ಟ್‌ಗಳ ನಾಮನಿರ್ದೇಶಿತ ನಿರ್ದೇಶಕರ ಬಹುಮತ ಬೆಂಬಲ ಕಡ್ಡಾಯವಾಗಿದೆ ಎಂದು ಟ್ರಸ್ಟ್‌ಗಳು ಹೇಳಿವೆ. ಇದೇ ನಿಯಮ ಮೊದಲ ನೇಮಕಕ್ಕೂ ಹಾಗೂ ಮರುನೇಮಕಕ್ಕೂ ಅನ್ವಯಿಸುತ್ತದೆ ಎಂದು ಅವು ಸ್ಪಷ್ಟಪಡಿಸಿವೆ.
ಅದೇ ರೀತಿ, ಟ್ರಸ್ಟ್‌ಗಳ ಇಬ್ಬರು ನಾಮನಿರ್ದೇಶಿತ ನಿರ್ದೇಶಕರು ಸಭೆಯಲ್ಲಿ ಹಾಜರಿರದೇ ಇದ್ದರೆ ಅಧ್ಯಕ್ಷರ ನೇಮಕ ಅಥವಾ ಮರುನೇಮಕ ಕುರಿತು ಮಂಡಳಿಯು ಸಭೆ ನಡೆಸಲು ಅಥವಾ ನಿರ್ಣಯ ಕೈಗೊಳ್ಳಲು ಸಾಧ್ಯವಿಲ್ಲ ಎಂದು ಟ್ರಸ್ಟ್‌ಗಳು ವಾದಿಸಿವೆ.
ಇದಲ್ಲದೆ, ಆ ಇಬ್ಬರು ನಿರ್ದೇಶಕರೂ ಪರವಾಗಿ ಮತ ಚಲಾಯಿಸಿದಾಗ ಮಾತ್ರ ಅಂತಹ ನಿರ್ಣಯ ಮಾನ್ಯವಾಗುತ್ತದೆ ಎಂದು ಹೇಳಲಾಗಿದೆ. ನೋಯೆಲ್ ಟಾಟಾ ಅವರು ಪ್ರಸ್ತಾವನೆಗೆ ವಿರೋಧವಾಗಿ ಮತ ಚಲಾಯಿಸಿರುವುದರಿಂದ, ಚಂದ್ರಶೇಖರನ್ ಅವರ ಮರುನೇಮಕ ಕುರಿತ ನಿರ್ಣಯ ಕಾನೂನುಬದ್ಧವಾಗಿ ಶೂನ್ಯವಾಗಿದ್ದು ಯಾವುದೇ ಆಧಾರ ಹೊಂದಿಲ್ಲ ಎಂದು ಟಾಟಾ ಟ್ರಸ್ಟ್‌ಗಳು ಪ್ರತಿಪಾದಿಸಿವೆ.
ಈ ಮೂಲಕ ಟಾಟಾ ಸನ್ಸ್‌ನ ಅಧ್ಯಕ್ಷರ ಮರುನೇಮಕ ಹಾಗೂ ಕಂಪನಿಯ ಭವಿಷ್ಯದ ಲಿಸ್ಟಿಂಗ್‌ ಕುರಿತ ಭಿನ್ನಾಭಿಪ್ರಾಯಗಳು ಇದೀಗ ಬಹಿರಂಗ ಸಂಘರ್ಷದ ರೂಪ ಪಡೆದುಕೊಂಡಿದ್ದು, ಮುಂದಿನ ದಿನಗಳಲ್ಲಿ ಈ ವಿವಾದ ಮತ್ತಷ್ಟು ಮಹತ್ವ ಪಡೆಯುವ ಸಾಧ್ಯತೆ ಇದೆ.

 ,