ಕುಮಟಾ: ಸಾಹಿತ್ಯ ಹಾಗೂ ಮಾಧ್ಯಮ, ಕನ್ನಡದ ಛಂದಸ್ಸು, ಹಾಗೂ ಯಕ್ಷಗಾನ–ರಂಗಭೂಮಿ ಕ್ಷೇತ್ರದಲ್ಲಿ ಅಪಾರ ಸೇವೆ ಸಲ್ಲಿಸಿರುವ ಕನ್ನಡದ ಮೂವರು ಸಾಧಕರಿಗೆ ‘ಶ್ರೀ ಮಹಾಬಲ ಶೋಧ ಸಂಸ್ಥಾನಂ’ ವತಿಯಿಂದ ಯಕ್ಷಗಾನದ ಯುಗದ ಕಲಾವಿದ ರೆಂದು ಖ್ಯಾತರಾದ ಡಾ. ಮಹಾಬಲ ಹೆಗಡೆ ಯವರ ಸ್ಮರಣೆಯಲ್ಲಿ ನೀಡಲಾಗುವ ಮೂರು ವಿಶೇಷ ಪ್ರಶಸ್ತಿಗಳನ್ನು ಪ್ರಕಟಿಸಲಾಗಿದೆ.
ಹಿರಿಯ ಪತ್ರಕರ್ತ, ಪ್ರಸಿದ್ಧ ಲೇಖಕ ಹಾಗೂ ‘ಕನ್ನಡ ಪ್ರಭ’ ದೈನಿಕದ ಪ್ರದಾನ ಸಂಪಾದಕ ಗಿರೀಶ್ ರಾವ್ ಹತ್ವಾರ್ ‘ಜೋಗಿ’ ಅವರಿಗೆ ‘ಅಕ್ಷರ ಮಹಾಬಲ’, ನಾಡಿನ ಖ್ಯಾತ ವಿದ್ವಾಂಸ, ಸಾಹಿತಿ, ಸಂಶೋಧಕ ಹಾಗೂ ಅಷ್ಟಾವಧಾನಿ ಡಾ. ಕಬ್ಬಿನಾಲೆ ವಸಂತ ಭಾರದ್ವಾಜ ಅವರಿಗೆ ‘ಛಂದ ಮಹಾಬಲ’, ಯಕ್ಷಗಾನ ಕಲಾವಿದ, ಸಂಘಟಕ ಹಾಗೂ ಕೆರೆಮನೆ ಇಡಗುಂಜಿ ಮಹಾಗಣಪತಿ ಯಕ್ಷಗಾನ ಮಂಡಳಿಯ ಮುಖ್ಯಸ್ಥ ಕೆರೆಮನೆ ಶಿವಾನಂದ ಹೆಗಡೆ ಅವರಿಗೆ ‘ರಂಗ ಮಹಾಬಲ’ ಪ್ರಶಸ್ತಿಯನ್ನು ಪ್ರಕಟಿಸಲಾಗಿದೆ.
ಡಿಸೆಂಬರ್ 25ರಂದು ಗೋಕರ್ಣದ ಅಶೋಕೆ ಯಲ್ಲಿ ಶ್ರೀರಾಮಚಂದ್ರಾಪುರ ಮಠದ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮೀಜಿಗಳ ಸಾನ್ನಿಧ್ಯದಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ ಎಂದು ‘ಶ್ರೀ ಮಹಾಬಲ ಶೋಧ ಸಂಸ್ಥಾನಂ’ ಮುಖ್ಯಸ್ಥರಾದ ಮೋಹನ ಭಾಸ್ಕರ ಹೆಗಡೆ ಹೆರವಟ್ಟ , ಡಾ. ಪರಮೇಶ್ವರ ಪಂಡಿತ, ಪ್ರಮೋದ ಪಂಡಿತ ತಿಳಿಸಿದ್ದಾರೆ.
ಅಕ್ಷರ ಲೋಕದ ಜೋಗಿಗೆ ‘ಅಕ್ಷರ ಮಹಾಬಲ’
ಗಿರೀಶ್ ರಾವ್ ಹತ್ವಾರ್ ‘ಜೋಗಿ’ ಅವರು ಕನ್ನಡ ಪತ್ರಿಕೋದ್ಯಮ ಹಾಗೂ ಸಾಹಿತ್ಯ ಲೋಕದಲ್ಲಿ ತಮ್ಮದೇ ಆದ ವಿಶಿಷ್ಟ ಛಾಪು ಮೂಡಿಸಿರುವವರು. ‘ಹಾಯ್ ಬೆಂಗಳೂರು’ ಪತ್ರಿಕೆಯಲ್ಲಿ ‘ಜಾನಕಿ’ ಎಂಬ ಹೆಸರಿನಲ್ಲಿಯೂ ಬರೆಯುತ್ತಿದ್ದ ಜೋಗಿ, ತಮ್ಮ ವಿಭಿನ್ನ ಬರವಣಿಗೆಯ ಮೂಲಕ ಓದುಗರ ಗಮನ ಸೆಳೆದಿದ್ದರು. ಅಂಕಣ, ಕಥೆ, ಕಾದಂಬರಿ, ವ್ಯಕ್ತಿಚಿತ್ರ, ವಿಮರ್ಶೆ ಸೇರಿದಂತೆ ಸಾಹಿತ್ಯದ ಹಲವು ಪ್ರಕಾರಗಳಲ್ಲಿ ಬರೆಯುತ್ತ ಬಂದಿರುವ ಜೋಗಿ ಅವರು ನೂರಾರು ಕೃತಿಗಳು ಹಾಗೂ ಬರಹಗಳ ಮೂಲಕ ಕನ್ನಡ ಸಾರಸ್ವತ ಲೋಕಕ್ಕೆ ಮಹತ್ವದ ಕೊಡುಗೆ ನೀಡಿದ್ದಾರೆ. ಪತ್ರಿಕೋದ್ಯಮದಲ್ಲಿಯೂ ತಮ್ಮದೇ ಆದ ನಿರ್ಭೀತ, ನಿಖರ ಹಾಗೂ ಆಪ್ತ ಬರವಣಿಗೆಯ ಶೈಲಿಯನ್ನು ರೂಪಿಸಿಕೊಂಡಿರುವ ಅವರು, ಪ್ರಸ್ತುತ ‘ಕನ್ನಡ ಪ್ರಭ’ ಪತ್ರಿಕೆಯ ಪ್ರಧಾನ ಸಂಪಾದಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಕನ್ನಡ ಭಾಷೆ, ಸಾಹಿತ್ಯ, ಪತ್ರಿಕೋದ್ಯಮ ಹಾಗೂ ಸಾಮಾಜಿಕ–ಸಾಂಸ್ಕೃತಿಕ ಬದುಕನ್ನು ತಮ್ಮ ಅಕ್ಷರಗಳ ಮೂಲಕ ದಾಖಲಿಸುತ್ತಾ ಶತಾಧಿಕ ಪುಸ್ತಕ ಲೋಕಾರ್ಪಣೆ ಗೊಳಿಸಿದ ಹಾಗೂ ನೂರಾರು ಸಮರ್ಥ ಬರಹಗಾರರನ್ನು ಬೆಳೆಸುತ್ತಾ ಬಂದಿರುವ ಜೋಗಿ ಅವರ ಸುದೀರ್ಘ ಅಕ್ಷರ ಸೇವೆಯನ್ನು ಗೌರವಿಸಿ ‘ಅಕ್ಷರ ಮಹಾಬಲ’ ಪ್ರಶಸ್ತಿಯನ್ನು ಪ್ರಕಟಿಸಲಾಗಿದೆ.
ಛಂದಸ್ಸಿನ ವಿದ್ವತ್ತಿಗೆ ‘ಛಂದ ಮಹಾಬಲ’
ಛಂದಸ್ಸಿನ ಆಳವಾದ ಅಧ್ಯಯನ, ಸಂಶೋಧನೆ ಹಾಗೂ ಯಕ್ಷಗಾನ ಸಾಹಿತ್ಯದ ಕುರಿತ ವಿದ್ವತ್ಪೂರ್ಣ ಬರಹಗಳ ಮೂಲಕ ಗಮನ ಸೆಳೆದಿರುವ ಡಾ. ಕಬ್ಬಿನಾಲೆ ವಸಂತ ಭಾರದ್ವಾಜ್ ಅವರು ಸಾಹಿತಿ, ಸಂಶೋಧಕ, ಅಷ್ಟಾವಧಾನಿ ಹಾಗೂ ಯಕ್ಷಗಾನ ವಿದ್ವಾಂಸರಾಗಿ ವಿಶಿಷ್ಟ ಗುರುತಿಸಿಕೊಂಡಿದ್ದಾರೆ.
ಕನ್ನಡ ಛಂದಸ್ಸು, ಯಕ್ಷಗಾನ ಪದ್ಯಪರಂಪರೆ ಹಾಗೂ ಸಾಹಿತ್ಯದ ವಿವಿಧ ಆಯಾಮಗಳ ಕುರಿತು ಅವರು ನಡೆಸಿರುವ ಅಧ್ಯಯನ ಮತ್ತು ರಚಿಸಿರುವ ಕೃತಿಗಳು ಕನ್ನಡ ಸಾರಸ್ವತ ಲೋಕದಲ್ಲಿ ಗಮನಾರ್ಹವಾಗಿವೆ. ಯಕ್ಷಗಾನ ರಂಗ ಕಲಾವಿದರಾಗಿ, ತಾಳಮದ್ದಳೆ ಅರ್ಥಧಾರಿಯಾಗಿ ಅವರು ಪ್ರಸಿದ್ಧರು. ಯಕ್ಷಗಾನ ಅಷ್ಟಾವಧಾನದ ಮೂಲಕವೂ ಅವರು ವಿಶಿಷ್ಟ ಪ್ರಯೋಗಗಳನ್ನು ನಡೆಸಿದ್ದಾರೆ. ಬ್ಯಾಂಕಿಂಗ್ ಕ್ಷೇತ್ರದಲ್ಲೂ ಅವರ ಸೇವೆ ಸಂದಿದೆ. ಛಂದಸ್ಸು ಮತ್ತು ಯಕ್ಷಗಾನ ಸಾಹಿತ್ಯಕ್ಕೆ ಅವರು ಸಲ್ಲಿಸಿರುವ ಬಹುಮುಖ ಕೊಡುಗೆಯನ್ನು ಗುರುತಿಸಿ ‘ಛಂದ ಮಹಾಬಲ’ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ.
ಕೆರೆಮನೆ ಶಿವಾನಂದರಿಗೆ ‘ರಂಗ ಮಹಾಬಲ’
ಕೆರೆಮನೆ ಶಿವಾನಂದ ಹೆಗಡೆ ಅವರು ಯಕ್ಷಗಾನ ಕಲಾವಿದ, ಸಂಘಟಕ ಹಾಗೂ ರಂಗಚಿಂತಕರಾಗಿ ಗುರುತಿಸಿಕೊಂಡವರು. ಕೆರೆಮನೆ ಇಡಗುಂಜಿ ಮಹಾಗಣಪತಿ ಯಕ್ಷಗಾನ ಮಂಡಳಿಯ ಮುಖ್ಯಸ್ಥರಾಗಿ ಯಕ್ಷಗಾನ ಪರಂಪರೆಯನ್ನು ಮುನ್ನಡೆಸುತ್ತಿರುವ ಅವರು, ಕಲಾವಿದರ ತರಬೇತಿ, ಪ್ರದರ್ಶನ, ಸಂಘಟನೆ ಹಾಗೂ ಯಕ್ಷಗಾನ ಕಲೆಯ ಪ್ರಸರಣದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ.
ಅವರು ಯಕ್ಷಗಾನ ಕ್ಷೇತ್ರಕ್ಕೆ ನೀಡುತ್ತಿರುವ ಸರ್ವತೋಮುಖ ಕೊಡುಗೆಗಾಗಿ ಹಾಗೂ ಯಕ್ಷಗಾನದ ಕೆರೆಮನೆ ಪರಂಪರೆ, ಕಲಾ ಶಿಸ್ತು ಮತ್ತು ರಂಗಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ಕೊಂಡೊಯ್ಯುವ ನಿಟ್ಟಿನಲ್ಲಿ ಅವರು ಸಲ್ಲಿಸುತ್ತಿರುವ ಸೇವೆಯನ್ನು ಗುರುತಿಸಿ ‘ರಂಗ ಮಹಾಬಲ’ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ.
ಕುಮಟಾ: ಸಾಹಿತ್ಯ ಹಾಗೂ ಮಾಧ್ಯಮ, ಕನ್ನಡದ ಛಂದಸ್ಸು, ಹಾಗೂ ಯಕ್ಷಗಾನ–ರಂಗಭೂಮಿ ಕ್ಷೇತ್ರದಲ್ಲಿ ಅಪಾರ ಸೇವೆ ಸಲ್ಲಿಸಿರುವ ಕನ್ನಡದ ಮೂವರು ಸಾಧಕರಿಗೆ ‘ಶ್ರೀ ಮಹಾಬಲ ಶೋಧ ಸಂಸ್ಥಾನಂ’ ವತಿಯಿಂದ ಯಕ್ಷಗಾನದ ಯುಗದ ಕಲಾವಿದ ರೆಂದು ಖ್ಯಾತರಾದ ಡಾ. ಮಹಾಬಲ ಹೆಗಡೆ ಯವರ ಸ್ಮರಣೆಯಲ್ಲಿ ನೀಡಲಾಗುವ ಮೂರು ವಿಶೇಷ ಪ್ರಶಸ್ತಿಗಳನ್ನು ಪ್ರಕಟಿಸಲಾಗಿದೆ.
ಕೆರೆಮನೆ ಮಹಾಬಲ ಹೆಗಡೆಯವರ ಬಗ್ಗೆ….
ಕೆರೆಮನೆ ಮಹಾಬಲ ಹೆಗಡೆಯವರು ಯಕ್ಷಗಾನ, ಸಂಗೀತ, ಸಾಹಿತ್ಯ ಹಾಗೂ ಕೃಷಿಯನ್ನು ಆಳವಾಗಿ ಅಭ್ಯಸಿಸಿದವರು ಹಾಗೂ ಅದರ ಉತ್ತುಂಗ ಸಾಧಕರು. ಅವುಗಳ ಪ್ರಸ್ತುತಿಯಲ್ಲಿ ಅವರು ಉನ್ನತ ಪರಿಣತಿ ಹೊಂದಿ ಸರ್ವ ಮಾನ್ಯರಾದವರು. ಇಂದಿಗೂ ಅದೇ ಪೂಜ್ಯ ಹಾಗೂ ಗೌರವ ಭಾವದಿಂದ ಅವರನ್ನು ಸಾಂಸ್ಕೃತಿಕ ಲೋಕ ಪರಿಭಾವಿಸುತ್ತದೆ. ಆದುದರಿಂದ ಮೂರು ವಿಭಿನ್ನ ಕ್ಷೇತ್ರಗಳಲ್ಲಿ ಕನ್ನಡ ನಾಡಿನ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ತಮ್ಮದೇ ರೀತಿಯಲ್ಲಿ ಬೆಳೆಸಿದ ಹಾಗೂ ಬೆಳೆಸುತ್ತಿರುವ ಮೂವರು ಸಾಧಕರಿಗೆ ಒಂದೇ ಸಂದರ್ಭದಲ್ಲಿ ‘ಮಹಾಬಲ’ ಗೌರವ ದೊರೆಯುತ್ತಿರುವುದು ವಿಶೇಷವಾಗಿದೆ. ಕುಮಟಾದ ಸದಭಿರುಚಿಯ ಸಾಂಸ್ಕೃತಿಕ ಸಂಘಟನೆ ಸೌರಭದ ಸಹಕಾರ ದಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ ಎಂದು
ಸಂಸ್ಥಾನದ ಟ್ರಸ್ಟಿಗಳಾದ ಮೋಹನ ಭಾಸ್ಕರ ಹೆಗಡೆ ಹೆರವಟ್ಟ, ಡಾ.ಪರಮೇಶ್ವರ ಪಂಡಿತ್ ಹಾಗೂ ಪ್ರಮೋದ್ ಪಂಡಿತ್ ಅವರು ಜಂಟಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
,
